كتبت: سلوى أبو زيد 

على مدى أكثر من 4 عقود، ظلّ علي الحجار صوتًا استثنائيًا في الغناء المصري والعربي، يحمل بصمة لا تشبه أحدًا، ويجمع بين الطرب الأصيل وروح الحداثة، صوته المميز كان حاضرًا في الوجدان لأجيال متعاقبة، من تترات المسلسلات التي شكلت ذاكرة المصريين في الثمانينيات والتسعينيات من القرن الماضي، إلى الأغاني الوطنية والعاطفية التي رددها الشباب والكبار معًا في كل مناسبة.

جمهوره الممتد من المراهقين إلى كبار السن يلتقي على محبته، وأداؤه يظل مرجعًا للفن الراقي، وصوتًا يصعب أن يتكرر.

أحيا على الحجار مؤخرا حفلاً غنائيًا بمسرح البالون احتفالًا بذكرى نصر أكتوبر، وسط حضور جماهيري كبير من مختلف الأعمار، بينهم أطفال من ذوي الهمم وسيدة مسنة أهدته باقة من الورد، ليثبت المشهد أن جمهوره من مختلف الأجيال تكون على مدار سنوات عدة.

فيما يلي نص الحوار الذي أجراه معه موقع بلاتوه 9 عقب الحفل:

• شاركتَ في حفلات ذكرى 6 أكتوبر بإحياء حفلا غنائيا ناجحا بمسرح البالون، كيف رأيت الأجواء؟

السنة اللي فاتت عملنا برضه حفلة 6 أكتوبر هنا في البالون، والحقيقة إن الفنان تامر عبدالمنعم – وبقول اسمه من غير ألقاب لأنه صديق عزيز – فنان جدًا جدًا مش بس كممثل. نفس البهجة اللي حسيناها كفنانين كانت متبادلة بينا وبين الجمهور من غير كلام، ودي رسالة الفن الحقيقية، إنه ينقل الفرح من غير ما يتقال.

Trending

مهرجان الأقصر للسينما الأفريقية يعلن عن شراكة جديدة في الدورة الخامسة عشر

• ما تقييمك لموقف مصر الأخير من قضية غزة ورفض نقل أهالي القطاع إلى سيناء؟

الشهور اللي فاتت شهدت تغيّر في مواقف بعض الدول اللي كانت شايفة نفسها قوية، وده بسبب رئيسنا القوي اللي رفض قرارات فيها تقليل من قيمة مصر. هو رفع قيمة البلد لفوق، وجيشنا بقى قوي جدًا جدًا، عشان كده كل اللي كانوا بيهددونا أو بيرغبونا عشان ينقلوا أهل غزة لسيناء تراجعوا. الرئيس شاف إن لو الناس دي اتنقلت من بلدها هتبوظ القضية اللي بندافع عنها من سنة 48، والقرارات اللي اتاخدت الفترة الأخيرة خلتنا فرحانين ببلدنا أكتر.

• كان لافتًا تفاعل الجمهور معك، خاصة الأطفال من ذوي الهمم والسيدة المسنة التي أهدتك وردًا، كيف شعرت بهذه اللحظات؟

النهاردة سواء أنا وفرقتي أو الجمهور كنا كأننا شخص واحد، بالنسبة لذوي القدرات الخاصة، اشتغلت معاهم قبل كده في فعاليات فنية وثقافية، ومعظمهم عندهم إحساس فني عالي جدًا، وبيتجاوبوا بعفوية من غير ما يتأثروا بميول أو رغبات زي الناس العادية. فرحتهم صادقة وبالنسبة لي أكبر من أي تقدير آخر، واللي بيطلع يرقص أو يطلع يتصور بيكون فرحان بصدق.

• نعود إلى بداياتك.. كيف كانت أولى خطواتك مع الغناء؟

من أول ما وعيت على الدنيا وأنا حابب أبقى مغني، لم أتمنى أن اصبح طبيبا أو مهندسيا، والدي كان صاحب صوت جميل وعازف عود ماهر، حافظ تقريبًا كل تراثنا من الموشحات والأدوار القديمة والطقاطيق والمنولوجات، حتى كلمة منولوج معناها واحد بيغني لوحده. أنا طلعت لقيت نفسي سامع صوت أبويا بيغني ويعزف العود بعد ما يجود القرآن بصوته الجميل، فحتى وأنا جنين كنت سامع موسيقى. الأم حالتها النفسية بتأثر على الجنين، فما بالك بأم طول الوقت سامعة صوت جميل وعود حلو. واضح إن أنا وأخويا أحمد الله يرحمه اتربينا كده، وكمان أخويا رأفت خريج معهد موسيقى، الجو ده خلاني حتى وأنا طفل ولسه ما قررتش هطلع إيه، شايف نفسي مغني، بس فكرة إني أبقى مشهور ما كانتش في دماغي، كنت عايز أغني وخلاص.

• نشاهد لابنك فيديوهات غنائية رائعة على السوشيال ميديا.. هل وجّهت له نصائح فنية؟

النصايح اللي أقدر أقولها له قلتها له كأب، لكن لا أسير ورائه أنصحه في كل خطوة، هو عرف طريقه من وهو صغير. جبناله مدرس من وهو عنده سبع سنين، وبعد ما خلص خمس سنين في معهد الموسيقى في القاهرة سافر أمريكا ودرس أصول التعريف الموسيقي وهندسة الصوت، هو تمرن على الفن وفاهمه، وصوته جميل يمكن بالوراثة يمكن لأ، مش كل ولاد الفنانين بيطلعوا مغنيين، هو الوحيد من أخواته اللي صوته ينفع.

• لك تاريخ طويل مع تترات المسلسلات.. لماذا لم نعد نراك فيها كما في الماضي؟

أنا غنيت أكثر من 120 تتر لمسلسلات، ومعظمها كان مفيد لأنه كان بيبقى فيه أغاني صغيرة بتعلّق على أحداث المسلسل، ولو حسبنا كل الأغاني دي يبقى عندي فوق 1500 أغنية، لأنها أغاني مكتوبة وملحّنة وموزعة واتسجلت في استوديو مهما كانت مدتها. وده رزقي إني غنيت مسلسلات أكتر من أي زميل لي. لكن أنا مش من النوع اللي يروح للمنتج يقول له والنبي شغلني أو يدخل يطلب يغني التتر، دي مش طريقتي حتى لو غيري بيشوفها شطارة. كل واحد له أسلوب في حياته، وأنا ما بعرفش أغيّره.

https://plato9.com/

• هل سبق أن جمعتك دويتو مع ابنك احمد الحجار؟

عملنا مع بعض منذ أكتر من 10 سنين أغنية إنجليزي، هو يرى إن الأغنية دي ممكن الأب يكون معاه فيها، ونزلت على السوشيال ميديا، مش كل الناس تابعتها لأنها بالإنجليزي، وغنينا كمان مع بعض في حفلات وفي برامج مع لميس الحديدي ومنى الشاذلي.